top of page
Search

探討壓力篇 001:認識壓力嘅意義


唔知大家係點定義「壓力」呢?


試諗下如果有一日,有個「輕鬆星人」嚟到地球,發現香港人成日都講壓力好大。口頭禪係「輕鬆啦!」嘅佢,好想了解多啲大家,同你做朋友,問你:「其實壓力係啲咩嚟?」你又會點答呢?

可能你會答:​​壓力係我哋周圍嘅人事物俾我哋嘅;

或者你會答:壓力係自己俾自己嘅。


其實,「壓力」分咗三大部分:「壓力源」、「壓力感」同「壓力反應」,睇落呢三樣野都好似好似,你又分唔分到佢地呢三兄弟呢?


簡單嚟講,壓力源就係令到我們產生壓力的源頭,例如:環境、健康、工作、家庭、經濟同人際關係等。而壓力源會使人產生壓力感,壓力感嘅大細取決於每個人管理自己壓力嘅能力、性格、思想信念同埋對自己嘅期望等等。 最後,唔同程度的壓力感,會引致唔同嘅壓力反應,喺生理、行為、情緒同認知等方面反映出嚟。由於每個人管理壓力嘅能力都唔同,所以就算面對類似嘅情境,壓力反應亦都因人而異。


言談之間,「輕鬆星人」身後面突然傳嚟一聲巨響:「嘭 ——!」

「咩聲呀?」



擰轉頭一望,原來「輕鬆星人」搭嚟地球嘅飛船爆咗!面對住熊熊火光,「輕鬆星人」先係呆咗幾秒,然後開始滴汗,心跳加速、身體亦都不由自主咁繃緊起嚟。呢一刻,佢腦入面只得一個諗法:「咁我要救火定遠離火場呢...?」


原來,呢一啲都係我哋係壓力下嘅身體反應。當我哋意識到自己受到威脅或者有危險嘅時候,身體會自動啟動一個自我保護機制,叫做「戰鬥或逃跑反應」(Fight-or-flight Response),等我哋嘅身體能夠第一時間作出反應,應對危機。除咗上面所講嘅反應之外,常見嘅身體反應仲有:口乾、呼吸急促、手震、腸胃不適等。呢一啲身體反應可以幫助我哋去留意自己係咪處於緊張嘅狀態。



火越燒越猛,喺時間嘅催促之下,「輕鬆星人」要喺短時間內作出抉擇,係佢嘅人生中第一次感到「壓力山大」。面對呢個危機,佢會選擇「戰鬥」定係「逃跑」呢?壓力係點樣作為推動力幫助「輕鬆星人」解決難題?如果想知道嘅話,咁你就要留意住我地心旅嘅post喇!

2 views0 comments

Recent Posts

See All

Comments


bottom of page