「你真係好冇用呀！咁都做唔到！」「你做嚟做去都係咁差！」「你咁樣冇人鍾意你呀！」呢啲令人聽落好唔舒服嘅責備，有冇試過喺你腦海出現過，不斷自己鬧自己？
如果有的話，你其實並不孤單，因為心理學家發現我哋大多數人喺面對一啲挫折或失誤嘅時候，都有類似責備自己嘅傾向！更值得一提嘅係，相比起對待其他人嘅失誤或唔完美，原來好多時候我哋係會對人哋更寬容，對自己就特別嚴格甚至苛刻。你有無同感呢？
我哋嘅腦袋有呢啲自我批評嘅傾向，係人類進化嘅過程中無疑係有佢嘅作用，去推動我哋增加生存嘅條件，督促我哋進步。但當自我批評變得太頻密或者太嚴苛嘅時候，佢就會變咗好似一個太熱心想幫忙嘅朋友，囉囉嗦嗦幫唔到手之餘，反而阻礙緊我哋前進，甚至引發抑鬱同焦慮嘅情況。咁當呢啲自我批評好似停唔到，變咗常態嘅時候，我哋可以學習乜嘢技巧應對呢？
原來近年有好多心理學嘅研究實證，練習「自我關懷」(self-compassion)嘅技巧，可以幫助我哋活得更輕鬆，減低抑鬱、焦慮、創傷後壓力等等嘅症狀，並且能加強我哋嘅適應能力、增加生活中嘅快樂同好奇，更能改善人際關係。
Comentários